中國作家協會主管

儂讀過《唐詩三百首》口伐？我講個是新編《唐詩三百首》，作者是上海嘉定人唐大郎。伊原名唐云旌，上世紀30年代就是蠻有名氣個職業報人。巔峰時期，伊每天要為六七家報紙趕稿，每家幾百字一篇，虧伊從來勿脫班，是名氣刮辣辣個“小報狀元”，有“江南第一支筆”之稱。1949年7月，唐大郎和老搭檔龔之方合辦《亦報》。1952年，《亦報》并入新民晚報社，唐大郎出任副刊部主任。1980年唐大郎病逝。

伊寫個古體詩講了交關當代故事，寫到自家生活瑣事、朋友交往，寫到上海戲院、書場里交關明星，連勿少社會新聞也寫進了詩里，一首首發表辣報紙浪，受到市民歡迎。伊姓唐，就叫自家寫個詩為“唐詩”，編出來就叫《唐詩三百首》了。勿講笑話：對阿拉上海人來講，迭本新《唐詩三百首》，比幾百年前個《唐詩三百首》更加接地氣。

唐大郎個詩是一只“萬花筒”，既有文人雅趣，又有市民生活，伊習慣用通俗個文字包裹五彩繽紛個感情。假使儂想感受當年小報文人個才情與生活，葛末讀讀伊個詩，肯定會讓儂回味無窮。

唐大郎待人真誠、交游廣闊：文娛界個周信芳、程硯秋、范雪君，文學界個夏衍、柯靈、吳祖光，電影界個費穆、洪深、桑弧，書畫界個唐云、黃苗子、黃永玉，還有新聞界個陳靈犀、王塵無，聞名蘇浙個書畫僧石瓢和尚，儕是伊個老朋友，伊覺著搿點朋友儕是伊個驕傲！按照伊個講法：“除了達官顯宦……九流三教人物，認得實在勿少。”

品讀“唐詩”，就像看一本老上海個方言詞典，字里行間儕是濃濃個市井味道。伊寫到舞廳個活躍，會得拿“探戈”迭個外來詞拆開來弄成諧音：“老夫欲犯當年癮，真想投池探一戈”；伊悼念亡妻寫：“怕看支離多病骨，教人腸斷憶臨終”，表達了真摯個夫妻感情；寫朋友追女明星個情場風波，借“詩注”拿前因后果寫得比小說還發噱。大家認為“唐詩”里頂好白相個是詩注，常常比詩本身還要精彩：勿但補全了故事空白，喜怒哀樂也有小品文一樣個風格，一記頭拉近了讀者距離；讓人屏勿牢要笑！

伊寫個詩里充滿掛辣嘴邊個上海口頭語。譬如“出窠兄弟計雙雙”，“出窠”指上海話里從小一道長大個“發小”，但更加有江湖氣，就像茄山河一樣自然；還有原式原樣保留了“巧克力美人”搿種對黑皮膚摩登女郎戲稱；像“四角洋鈿買香蕉”個七字句，就拿水果攤個叫賣聲也寫進去了。張愛玲佩服伊發明了“用詩注做新聞報道”。柯靈則稱贊伊為人為文通體透明，有“水晶肚皮”風格。搿種文風讓伊個詩成了上海個方言博物館，充滿了鮮活個上海特色。

對阿拉來講，唐大郎個詩就像弄堂口大家熟悉個大餅油條，一口咬下去味道噴香。伊囥辣平仄、韻腳里個上海味道，土生土長個“老克勒”“老好婆”儕能品出妙處。如果講唐詩里有平仄、押韻織成個都市文化密碼。阿拉完全可以從“嗲”“噱”“扎臺型”等關鍵詞來解讀。通過迭本《唐詩三百首》，讀者能摸到當年上海石庫門磚墻個溫度，聽到有軌電車“叮叮當當”鈴聲個回響。